(21 март. “Апастово-информ”).

Истәлек чарасы, җылы очрашу буларак узучы хоккей турнирына Арамисның әнисе Рәфидә апа, бертуган абыйсы Рөстәм Зәйниевлар, туганнары, дуслары җыелды. Һәркем Арамисны гадел, тырыш, спорт сөючән егет буларак искә алды.

“Улым Арамисның арабыздан киткәненә 6 ел булса да, аның турында дуслары күңелендә якты истәлекләр, матур хатирәләр яшәвенә шатланам, горурланам. Барлык оештыручыларга ихлас рәхмәтемне белдерәм. Улым ихлас күңелле, ярдәмчел, аралашучан булды. Үзе дә бик күп күп хоккей ярышлары оештырды”, — диде Рәфидә апа Зәйниева.

Турнирда Кайбыч, Чүпрәле, Тәтеш, Буа һәм Апастан ир-егетләр командалары көч сынаша.

Уеннар тантаналы төстә башланып китте. Хоккейчыларны яшьләр эше һәм спорт бүлеге җитәкчесе Ленар Мотыйгуллин сәламләп, уңышлы, гадел уеннар теләде.